PANAWAGAN

Tunguhin 

Ang Malay, isang multi/interdisiplinaring dyornal sa Araling Filipino ng Pamantasang De La Salle, Manila na internationally refereed at abstracted, ay naglalayong maglathala ng mga lathalain tungkol sa mga usapin at dalumat kaugnay ng wika, kultura, at mass media na nagsusulong ng intelektuwalisasyon ng wikang Filipino. Sa ganitong tunguhin, tanging mga papel na nakasulat lamang sa wikang Filipino ang tinatanggap ng Malay. 

 

Detalye ng Paglilimbag 

Inililimbag ang Malay makalawa isang taon sa ilalim ng pamamahala ng De La Salle University Publishing House ng Pamantasang De La Salle, Manila. Bilang multi/interdisiplinaring dyornal, nagtatampok ang Malay ng mga papel (riserts, rebyu, at artikulo) na naglalahad ng mga kaisipan at kaalaman mula sa Araling Filipino na may tuon sa wika, kultura, at mass media. Ang mga ideya, opinyon, at paninindigan ng awtor ay kanilang pananagutan at hindi sumasalamin sa mga pagkukuro at patakaran ng mga patnugot, ng kaguruan, o ng pangasiwaan ng Pamantasan. 

 

Proseso ng Pagrerebyu 

Mga miyembro ng Internasyonal na Lupon ng mga Patnugot at ng iba pang mga kilalang iskolar sa kani-kanilang disiplina ang nagrerebyu sa mga papel. Dalawang iskolar ang nagrerebyu sa  bawat papel. Sa pagkakataong may magkasalungat na pagpapasiya ang dalawang rebyuwer, ito ay pagpapasiyahan ng mga editor. Ang buong prosesong ito ay isinasagawa nang hindi nalalaman ng awtor kung sino ang rebyuwer ng kaniyang papel, at gayundin, hindi ipinakikilala sa rebyuwer kung sino ang awtor ng kaniyang nirerebyung papel. 

Mula rito, muling nirerebyu ng Punong Patnugot ang mga nakapasang papel mula sa mga naunang nagrebyu nito. Ang mga papel na nakapasa sa rebyu ngunit nangangailangan ng  rebisyon ay ibinabalik sa mga awtor para matugunan ang mga kahingian ng mga rebyuwer. Ang mga awtor ng mga papel na hindi matatanggap ay padadalhan ng liham na naglalaman ng mga puna at komento ng mga nagrebyu. May karapatan ang mga Patnugot na maging pag-aari ang kopya ng lahat ng papel na ipinasa. 

 

Detalye ng Pagsusumite 

Ang mga papel ay dapat na nasa wikang Filipino at kailangang hindi pa nailathala o naisumite para sa konsiderasyon sa ibang publikasyon o dyornal. Isang 200-250 salitang abstrak at limang susing salita, kapuwa nasa wikang Filipino at Ingles, ang hinihiling na kalakip sa papel na may 5,000 hanggang 7,000 salita (20-40 pahina). Ang pamagat ng papel ay dapat may salin sa wikang Ingles. 

Ang papel ay kailangang kompyuterisado sa maikling bond paper na may isang pulgadang palugit sa lahat ng gilid, doble-espasyo, gamit ang font na Times New Roman, may sukat na  12-puntos, at maayos na naidokumento gamit ang MLA Seventh Edition. 

Kailangang minimal ang mga dulong tala. Kung sakaling may larawan o ilustrasyong bahagi ng sabmisyon, ang file ay kailangang nasa format na jpeg at malinaw ang kopya. Kailangan ding may kapsiyon at karampatang pagkilala sa pinaghiraman o may-ari/may likha ng larawan/ilustrasyon. 

Ang pangalan ng awtor, tirahan, e-mail, at iba pang mahahalagang kontak ay kailangang nakasulat sa hiwalay na papel. Anomang pagkakakilanlan sa identidad ng awtor ay kailangang wala sa manuskrito. Ilakip sa sabmisyon ang isa hanggang dalawang talatang bionote para sa pagkakakilanlan ng may-akda. 

 

Tinatanggap ang mga sabmisyon sa pamamagitan ng e-mail sa [email protected] 

 

Bukas ang panawagan para sa submisyon ng mga artikulo buong taon.